شلون تجري ومايك ازرك يا فرات ؟
وانتَ ذنبك مو ذنب يكَطر دمه
تسابكَت بالطف على حسين السيوف
ومايك اول سهم في صدره انرمه
جان مايك احد من كل السيوف
حيل اثر بالحسين وألمه
بس بنات المصطفى حر الجبود
حسين حر وهاي للحر تلجمه
وعطش عبد الله الي فرفح بين اديك
كَطع كَماطه ولعد مايك ومه
طاح أبو السجاد يم جرفك شهيد
بين سيفين العدى وسيف الظمه
أنا لو منك اودي ويه الطيور
الماي خاطر منسئل ليش ولمه
لاجن انت تريد تذنب يا فرات
وهاي ما تحتاج شرح وترجمه
انفرط عقد الدين وعيونك تشوف
وجان ممكن شربه منك تلظمه
عطشيت الدين عن بكرة ابيه
وكَطعيت جفوف سع الموزمه
تدري لو مايك وصل يم الخيام
جا روه العباس منهم صارمه
وجان ما ردت روؤس على الرماح
جان ردت خيلهم تكَطر دمه
شلون طاح حسين يم جرفك شهيد ؟
وما ركض مايك لعد جدمه انرمه
طاعت اسماعيل صحراء الحجاز
وانت شح مايك لبن حامي الحمه
ما اظن أسماعيل أفضل من حسين
وما أظن امه تقدم فاطمــــــــــــــه
ذاك ابن واحد سأل رب الجليل
كيف تحيي الموته وترد قائمه
وهذا أبن حيدر علي سيف الرسول
المايخاف بدينه لومة لائمه
الكَال لو ينكشف عن عيني الغطاء
مايزيد من اليقين الفاهمه
يا فرات وبعد تجري يا فرات ؟
المايشوف الحق عسه بعينه العمه
كَوم طم روحك حدر كَبر الحسين
واغتفر لله وأطلب مرحمه
كَوم وأغسل برمل الحسين
وخلي مايك يا نهر يتيممه
الفرق شوفه بينك وبين الكرام
حسين شاف الدين عطشان لدمه
ضحه بأخر قطره من دمه الشريف
وظلت اخر قطره ثوره واقائمه
حسين اصل الجود وانت اصلك نهـــر
ويا نهر للنبع انطه وكرمه
حسين صافي واصفى من ماي الجنان
وانت اصلك طين وجروفك طمه
حسين لومنك شرب جان ارتويت
وجا تشرف مايك ولامس فمه
لكن انتَ الحظ عماك وتيهيت
وسوء حظك
رادلك هالخاتمه
السبت أكتوبر 08, 2011 7:45 am
